Messi Atoboa Siri Ya Kubadili Rangi Ya Nywele Zake.

Tarehe September 5, 2016

Lionel Messi. Mchezaji wa Argentina na Klabu ya Barcelona, Lionel Messi ametoboa siri ya kwanini aliamua kubadili staili za nywele zake na kuzipaka rangi maarufu kama ‘Blonde Hair.’

Mchezaji huyo ambaye ni nahodha wa Argentina alizua minong’ono katika ulimwengu wa soka duniani pale alipotokelezea na staili mpya ya nywele alipokuwa mapumzikoni na familia yake.

Alipobanwa kuhusiana na staili hiyo, Messi alithibitisha kuwa kitendo hicho kilikuwa sehemu ya kujitafakari kufuatia kushindwa kwa Taifa lake katika fainali ya michuano ya Copa America, 2016 akishuhudia timu ya Chile ikiondoka na kombe hilo kwa mara nyingine tena mbele yao.

“Siku moja maalum na ngumu sana nilijiambia kuwa ninapaswa kuwa na mapumziko mazuri pamoja na kuwa na mwanzo mpya, nikabadili na nywele zangu, nilipaswa kuanza tena kutoka mwanzoni kabisa,” amesema Staa huyo wa Barcelona katika mahojiano maalum.

Wakati huohuo, Messi amekiri kuwa mtoto wake wa kiume mdogo, Thiago inawezekana asifuate nyayo zake, kwani haoneshi kuwa na mapenzi na mpira.

“Najaribu kutompa Thiago mipira kama zawadi, hapendi mpira sana,” amesema.