Tarehe September 19, 2016
Katika kijiji cha Ntundu, Kata ya Busangi katika Halmashauri ya Msalala wilaya Kahama Mkoani Shinyanga, watu wawili wamepoteza maisha na wengine watano kujeruhiwa baada ya kupigwa na radi wakati wakiwa wamejikinga mvua chini ya mti kando ya malambo ya kunyweshea mifugo.
Kamanda wa Polisi Mkoa wa Shinyanga, Muliro Jumanne amesema, ajali hiyo ilitokea juzi saa 8.30 mchana katika kijiji hicho wakati mvua ilipokuwa ikinyesha, watu hao waliamua kujikinga kwenye mti na radi ikapiga na kusababisha vifo hivyo kutokea.
Kamanda Jumanne aliwataja waliofariki ni Fikiri Paschal (35) na Maneno Luzalia (16), wakati waliojeruhiwa na kupata mshituko baada ya radi kupiga ni watano ambao ni Mhoja Pasian (32), Abeli Feleshi (12), Nhungwa Jeremiah (22), Juma Mussa (16) na Paschal Mabula (11) ni mwanafunzi wa Ntundu.
“Waliopigwa radi ni watu saba ambao walikuwa wamejikinga mvua chini ya mti, kati yao wawili walikufa papo hapo na wengine watano walijeruhiwa na kukimbizwa kupatiwa matibabu katika zahanati ya Busangi na hali zao zinaendelea vizuri,” amesema Kamanda Jumanne.
Kamanda Jumanne aliwataka wananchi kutokaa karibu na miti, hasa kipindi hiki mvua za masika zinapokaribia kuanza kunyesha kwa wingi ili kuepuka tukio kama hilo lisije kujirudia tena, kwani tukio hilo limepoteza maisha ya watu wawili, huku akifafanua kuwa katika mfumo wa umeme ni rahisi kupata madhara, hivyo ni vema wakachukuwa tahadhari.