Tarehe September 6, 2016
Mwamuzi, Mark Clattenburg.
Pengine wikendi hii inaweza kuwa moja ya wikendi zinazosubiriwa kwa hamu sana na mashabiki wa soka hasa wale wa Ligi Kuu Uingereza, pale miamba ya Soka ya Jiji la Manchester itakapokutana siku ya Jumamosi katika dimba la Old Trafford.
Siku hiyo itakuwa ni mechi ya kukata na shoka kati ya Manchester United na Manchester City, wenyewe wanapenda kuiita ‘Manchester Derby’ kwa maneno mengine ni ‘Simba na Yanga’ ya Jiji la Manchester.
Mechi hiyo inasubiriwa kwa hamu sio tu kwa ajili ya kuona ushindani wa wachezaji wapya waliosajiliwa katika timu hizo wakionesha mambo yao ndani ya uwanja, bali pia nje ya uwanja kutakuwa na burudani ya aina yake pale makocha wawili mahasimu wakubwa, Jose Mourihno wa Man United na Pep Guardiola wa Man City watakapokuwa wanashikana mashati kama kawaida yao kufuatia historia ndefu sana inayoanzia katika soka la Uhispania.
Lakini mtu pekee ambaye amepewa jukumu la kuhakikisha anawaongoza wachezaji ndani ya uwanja na makocha hao nje ya uwanja ni Mwamuzi, Mark Clattenburg.
Clattenburg kwa sasa ni mmoja wa makocha bora zaidi barani Ulaya ambaye ameshawahi kuchezesha fainali kadhaa kwa ustadi mkubwa ikiwemo ile ya Ligi ya Mabingwa kati ya Real Madrid na Atletico Madrid, ambapo Madrid iliibuka kidedea kwa mikwaju ya penati baada ya kutoka sare ya bao 11.
Mwamuzi huyo mwenye miaka 41, ambaye ameshachezesha mechi za Ligi Kuu Uingereza kwa zaidi ya miaka kumi, aliweka rekodi ya kucheza ‘hattrick’ yaani fainali tatu mfululizo msimu uliopita akiwa amecheza fainali za FA Cup, Ligi ya Mabingwa (Champions League) na Michuano Midogo ya Ulaya (EUROPA).
Clattenburg pia ana uzoefu na mechi za ‘Manchester Derby’ ndani ya Old Trafford kwa misimu miwili iliyopita, na siku ya Jumamosi atakuwa akisaidiwa na Jake Collin and Steve Bennett wakati Mike Dean atakuwa kama mwamuzi wa nne.
Katika mechi hiyo, mchezaji wa Manchester United, Paul Pogba anategemewa kunga’ra huku mchezaji mwenzake, Henrik Mkhitaryan akiwa bado katika hatihati ya kuikosa mechi hiyo.
Mark Clattenburg, alipongezwa sana kwa jinsi alivyochezesha fainali za Euro 2016, Jijini Paris.